നഷ്ടസ്വപ്നങ്ങൾ

പി.വി.മോഹനൻ, ഇരിട്ടി


ഒരുവേളയെങ്കിലും 
തിരികെ എന്നരികിലായ്
വരുമോ വിളിച്ചാലെന്നമ്മേ ?
കൺനിറയെ കാണുവാൻ
ആഗ്രഹമുണ്ടേറെ
അമ്മയുടെ  മടിയിൽ
തലചായ്ച്ചുറങ്ങാൻ
സ്വപ്നങ്ങളിലേറെയും
പുഞ്ചിരിതൂകുന്നൊ-
രമ്മതൻ മുഖമത്രെ കാണ്മൂ
കഥകേട്ടുറങ്ങുന്ന 
രാവുകൾ വന്നിടാൻ
കാത്തിരിക്കുന്നു ഞാനെന്നും
ഒറ്റയ്ക്കിരിക്കെ ഒരായിരം ഗതകാല
സ്മൃതികളുണരുന്നു  ചുറ്റും
മാതൃവാത്സല്യം പകരാൻ മനസ്സുള്ള
മാതാവ്‌ ദൂരെ മറഞ്ഞു
നന്മകൾ മായുന്ന 
മണ്ണിതിലൊറ്റയ്ക്കായ്
ഖിന്നനായലയുന്നു ഞാനും
അമ്മയുറങ്ങുന്ന 
മണ്ണിൻ മടിയിൽ ഞാൻ
അല്പമിരുന്നുറങ്ങട്ടെ
നഷ്ടസ്വപ്നങ്ങളെ 
വീണ്ടെടുക്കട്ടെ ഹാ!
തീർക്കട്ടെ ഞാനെന്റെ ദുഖം