ഉരുക്കു വനിത

പി.പി. റഫീന


ഞെട്ടറ്റുവീണൊരിലയിലെ
ലാർവപോൽ നീ
തൊലിയുരിഞ്ഞിട്ടും
മാനം കാത്തവൾ.
വിലങ്ങണിഞ്ഞവൾ നീ
വിധിക്കു മുന്നിൽ
പതറാത്ത പാദമുള്ളവൾ
നീ... സ്ത്രീ
പഴുത്ത കാലത്തിന്റെ
പാവന സ്മരണയ്ക്ക്‌
ഫോർമാലിനിൽ മുങ്ങിയവൾ
ഹവ്വ മുതൽ തുടങ്ങിയ
ആദിപാപത്തിന്റെ
ഭാരം പേറുന്നവൾ
നിനക്കുമഭയമില്ലേ
ബൂട്ടണിഞ്ഞ കാവല്ക്കാർക്കിടയിലും ?
വിപ്ലവം നടത്തിയവളെ
നിന്റെ വാക്കുകളിൽ ക്കൂടി
നീ ഉയിർത്തെഴുന്നേൽ ക്കുക
ഭോഗവും, ഭോജനവും,
സ്നേഹവും സ്നാനവും
സ്ത്രീധനത്തിനു വേണ്ടിക്കളഞ്ഞവൾ
മണിപ്പൂരിന്റെ നിശ്ശബ്ദ
ഗർജ്ജനം നീ
മുടിയഴിച്ചിട്ട യുവതിയാം
ഭ്രാന്തി നീ
നഗ്നപാദയായ് നമ്രശീർഷയായ്
മണിയറയിൽ കഴിയേണ്ടവൾ
പശിയെ പിൻപറ്റി സമരഭൂവിൽ
നീയാണു നീതി !
ത്രാസുമായി നില്ക്കുന്ന
കണ്ണുമൂടിയവൾ
ഇരുട്ടിനെ വലിച്ചെറിഞ്ഞ്
പൊരുതൂ......
ഷഹരിയാറിന്റെ വാളിനു നേരെ
ധീരയായ് പൊരുതൂ.....
പുതു വിപ്ലവം നടത്തൂ...

ഭൂമിക്ക്‌ പനിക്കുന്നു

ജിഷ  കൊളക്കാട്‌


ഭൂമിതൻ മജ്ജ ചുരണ്ടിയെടുത്തു നാം
ഒട്ടേറെ മണിമേട കെട്ടുന്നു ഞൊടിയിടെ
കോൺക്രീറ്റ്‌ മാളികക്കൃഷികൾ തഴയ്ക്കുന്നു
സ്വാർത്ഥത മൂത്തു സ്വഭാണ്ഡം നിറയ്ക്കുന്നു
ഭൂമിതൻ ഓജസ്സും തേജസ്സും ഛേദിച്ച്‌
ഹരിതാഭ കൊല്ലുവാൻ വെമ്പലാണിപ്പോഴും
എൻ തോളിലും തണലിലും രാപ്പാർത്തുറങ്ങുവാൻ
മേല്ക്കൂര തേടിയലയുന്നു പാവങ്ങൾ !
ന്യൂട്രോണും പ്രോടോണും പ്രണയിച്ചു പ്രണയിച്ചു
മാനവരാശിതൻ ചലനം നിലയ്ക്കുമോ.........?
ദിഗന്തം നടുങ്ങുന്ന യുദ്ധങ്ങളെപ്പോഴും
ദു:ഖങ്ങൾ നാശങ്ങൾ മാത്രം വരുത്തുന്നു
ഇനിയും പിറക്കാത്ത തളിരുകളേ നിങ്ങൾ
ഈ ഉദരത്തിനു മാപ്പു തരൂ........
ആവില്ല നിങ്ങൾക്കീക്കാലത്തു ജീവിക്കാൻ
മാനവും മേനിയും കല്മഷമായിടും
പിഞ്ചിളം മെയ്യിലും ചുടുചോര തേടുന്നു
ആസക്തിയാം കറ പൂണ്ടു ചിലരിവർ..........
ഇനിയൊരു മോക്ഷമുണ്ടാവണം മർത്ത്യനിൽ.......
തിന്മതൻ നിഗ്രഹം നല്കണം മർത്ത്യനിൽ........

ആലക്കോട്‌ മേഖല

കവിമണ്ഡലത്തിന്റെ ആറാമത്തെ മേഖലയായ ‘ആലക്കോട്‌ മേഖല’യുടെ ഉദ്ഘാടനം 2014 ജൂൺ 1 ന്‌ കരുവഞ്ചാൽ കേരള സീനിയർ സിറ്റിസൺസ്‌ ഫോറം ഹാളിൽ വെച്ചു ജനറൽ കൺവീനർ രാമകൃഷ്ണൻ കണ്ണോം നിർവഹിച്ചു. .പി.കുമാരൻ (വയോജനവേദി സംസ്ഥാന ജനറൽ സെക്രട്ടറി) അധ്യക്ഷനായും വെദിരമന വിഷ്ണു നമ്പൂതിരി (കേശവതീരം) വിശിഷ്ടാതിഥിയായും വേദിയെ ധന്യമാക്കി. നിറഞ്ഞ സദസ്സ്‌ ചടങ്ങിന്‌ സാക്ഷ്യം വഹിച്ചു.  
ഉദ്ഘാടനത്തിനു ശേഷം കവിയരങ്ങും നടന്നു.
ആലക്കോട്‌ മേഖലാ കൺവീനർ :    ശ്രീ. പി.റ്റി.തമ്പി.