എൻ.കെ.കൃഷ്ണൻ
എനിക്കൊരാഗ്രഹം ധ്രുവഹിമാബ്ധിയിൽ
വിവസ്ത്രരൂപിയായ് തപസ്സിരിക്കുവാൻ
എനിക്കൊരാഗ്രഹം പ്രപഞ്ചനാഭിയിൽ
കറുത്ത ബിന്ദുവായൊളിച്ചുറങ്ങുവാൻ
എനിക്കൊരാഗ്രഹം ഹിമാലാദ്രിയിൽ
വെളുത്തമേഘമായുരുമ്മി നീന്തുവാൻ
എനിക്കൊരാഗ്രഹമനന്തനീലിമ
തുളച്ചു കുത്തനെ കുതിച്ചുചാടുവാൻ
എനിക്കൊരാഗ്രഹമഗാധസാഗര-
പരപ്പിലൂളിയിട്ടടിത്തടം തൊടാൻ
എനിക്കൊരാഗ്രഹം പ്രണയഗീതികൾ
ചുരത്തും ഭാവവും രസവും മോന്തുവാൻ
എനിക്കൊരാഗ്രഹം ചിരിക്കും കുഞ്ഞിന്റെ
കവിൾത്തടത്തിലെ പ്രകാശമാകുവാൻ
എനിക്കൊരാഗ്രഹം ഒരാഗ്രഹംപോലും
മനസ്സിൽ തോന്നാതെ തനിച്ചിരിക്കുവാൻ !
No comments:
Post a Comment